Ықтималдықтар теориясы және математикалық статистика курсы I: Жоғары оқу орындарының «Математика» мамандығына арналған: оқулық

Оқулық автордың бірқатар жылдар бойы Әл-Фараби атындағы Қазақ ұлттық университетінің механика-математика факультетінің математика бөлімі студенттері мен магистрлеріне оқыған дәрістері негізінде жазылған. Кітапта ықтималдықтар теориясының математикалық негіздері Колмогоров аксиома-тикасына сүйене отырып баяндалған. Алғашқы тарауда кездейсоқ оқиғалар және олардың ықтималдықтарына қатысты мәліметтер дискретті ықтималдық кеңістігі аясында берілген. Екінші тарау жалпы ықтималдық кеңістігіне арналған. Үшінші тарауда кездейсоқ шама ұғымы өлшенетін функция ретінде анықталған. Төртінші тарауда қарастырылатын математикалық күтім ұғымы ықтималдық кеңістігіндегі ықтималдықтық функция бойынша алынған Лебег интегралы ретінде енгізілген, бірақ оқырманнан Лебег интегралына байланысты ешқандай мағлұматтарды алдын ала білу талап етілмейді. Соңғы тарауда Бернулли схемасындағы шектік теоремалар қарастырылған. Оқулықтың әр параграфының соңында параграфта қамтылған материалдарды оқушының табысты меңгеруін қамтамасыз ету мақсатында және кредиттік технология бойынша оқыту талаптарына сәйкес оқушының өз бетімен орындауына арналған тапсырмалар топтамалары ұсынылған. Кітап соңында тапсырмалардың жауаптары, пәндік сілтемелер, белгілеулерге байланысты сілтемелер және дәстүрлі нормаль және пуассондық үлестірімдерге қатысты қажетті қосымшалар келтірілген. Оқулықтың құрылымы және кітаптағы материалдардың орналастырылуы бұл оқулықты математика ғана емес, математикаға жақын басқа да информатика, механика, физика, матема¬тикалық және компьютерлік модельдеу, т.с.с. мамандықтар студенттері мен магистрлерінің де пайдалануына мүмкіндік береді.